لا والله إلا رحت فيها ! والبلا كاني بكيت
...........الحزن داهمني ونفسي ضايقه من مابها
بديت احس الكون يصغر في عيوني وابتديت
...........اكره مكاني والرياض ! ايضيق بيّ اترابها
راحت غرام القلب واصدق قلب فالدنيا لقيت
...........هي سافرت عني ! وانا والله ماطيق اغيابها
امنول اقوى بعدها واليوم عاجز ما قويت
...........تاخذني الذكرى لها لحد موصل بابها
انام من كثر التعب , واتعب ليا مني صحيت
...........أعيشها واليا غفيت أغفابها واصحابها
احاول اجفاها ولكن فالحقيقه ما جفيت ؟
...........إلا علاقتي مع العالم عشان اعجابها
ياويل حالي يامساعد ياكبر حظ الكويت
...........لا والله إلا حظ اهاليها وحظ اقرابها
حبيتها مو مشكله ! مشكلتي الكبرى نسيت !
...........ليلة فراق الغاليه ! نسيت احسب احسابها
نسيت لحسب لحظة فراق الهنوف اللي هويت
...........نسيت كيف احيا ! حياتي دامني ما احيابها
والله ما بغى شي من دنياي ! بس اللي بغيت ؟
...........ودي اكون اقرب لها من عطرها فثيابها
ينتابني يأس وملل واحس بحساس ٍ مميت
...........واقدر احلف ان الذي ينتابني ينتابها
شعور ماحسيت به من يوم فالدنيا وعيت
...........احساس ماحسيت به من قبل اشوف اهدابها
الله من كثر التعب واللي من الفرقى جنيت ؟
...........سهر قصيد اهموم كل هذي وش اللي جابها؟
اعيش يومي ودي اهنى مير عدى ما اهتنيت
...........اصلاً انا وشلون ابهنى ! دامني ما اهنابها
هذي لو اني عشت معها طول عمري ما اكتفيت
...........لكن عساها سالمه للشايب اللي جابها
مكتوب واللي كاتبه ربي تراني به رضيت
...........عسى الله يهون على نفسي مصاب ٍ صابها
يامساعد اليوم انتهى وانا مع اليوم انتهيت
...........مابه جديد ! إلا بقايا شاعر ٍ يبقى بها
ادري تشوف ان التعب فيني ولا ودي دريت
...........ادري وندري كلنا ! غيري تراه اولابها
بس الذي خلاني احكي كل ماعنه حكيت ؟
...........هي حاجة ٍ نسيتها من قبل وقت اغيابها
حبيتها مو مشكله ! مشكلتي الكبرى نسيت
...........ليلة فراق الغاليه نسيت احسب احسابها